Preisnan na Hulanda Karibense basta mas haltu den 2011
Den 2011, e preisnan promedio di konsumidó na Hulanda Karibense tabata basta mas haltu ku un aña promé. Sint-Eustatius tabatin e inflashon di mas haltu, 9,9 porshento. E oumento di preis na Boneiru tabata di 5,4 porshento i na Saba 6,4 porshento. Komo komparashon, na Hulanda inflashon na 2011 tabata 2,3 porshento.
Inflashon na Boneiru
Preis di alimento na Boneiru bastante mas haltu den 2011
Na Boneiru, prinsipalmente preis di kuminda, bibida no alkohóliko i transporte a kontribuí na e inflashon. Aña pasá, kuminda tabata 7,8 porshento mas karu ku na 2010. Por atribuí esei prinsipalmente na preis di karni. Transporte a bira mas karu prinsipalmente debí na subida di preis di pasashi di avion. Preis di gasolin tambe a yuda subi inflashon. Preis di gasolin a subi prinsipalmente den e promé mitar di aña. Preis di paña tambe a subi den 2011 ku 11porshento.
Inflashon na Sint-Eustatius
Sint-Eustatius tabatin e inflashon di mas haltu
Sint-Eustatius a mira e mayor subida di preis den 2011, 9,9 porshento. Esei tabata debí prinsipalmente na subida di preis di transporte na kuminsamentu di aña. Pasashi di avion i kombustibel pa outo a subi drástikamente den e temporada ei. Subida di preis di energia i hóreka tambe a kontribuí supstansialmente na inflashon. Preis di koriente a subi den e lunanan di mei, yüni i yüli debí na adaptashon na subida di preis di kombustibel. Den 2011, hóreka a bira kasi 25 porshento mas karu ku un aña promé. Den e promé kuartal di 2011, hopi establesimentu di hóreka a subi nan preisnan komo resultado di e sistema fiskal nobo introdusí den 2011.
Inflashon na Saba
Preis di transporte i kuminda ta subi inflashon na Saba
Na 2011, inflashon na Saba tabata di 6,4 porshento. Preisnan di transporte ta loke a kontribuí mas na esei. Meskos ku riba e otro islanan, esaki tabata debí prinsipalmente na subida di preis di pasashi. Na Saba tambe kombustibel pa outo a bira bastante mas karu. Na 2011, alimento i bibida no alkohóliko tabata 9 porshento mas karu ku un aña promé. Karni, pan i otro produktonan di grano a hunga un ròl importante den esaki. Un di tres faktor importante den e subida di inflashon tabata e oumentonan di preisnan di hóreka. Na 2011 esakinan tabata kasi 21 porshento mas haltu ku un aña promé. Meskos ku na Sint-Eustatius, e subida akí a tuma lugá den e promé kuartal.
Fuente: StatLine, Caribisch Nederland