Poblashon Hulanda Karibense a krese ku mas di 1,2 mil habitante den 2025

Mas di mil habitante a bin aserka na Boneiru

Riba promé di yanüari 2026 Boneiru tabatin 27.611 habitante. Esei ta 1.059 mas ku un aña anterior, un kresementu di 4 porshento. E subida tabata partikularmente debí na migrashon: mas hende a muda pa Boneiru kompará ku e kantidat ku a bai (1.171 mas). Ademas tin mas hende a nase kompará ku e kantidat di hende ku a fayesé (82 mas).

Na Boneiru partikularmente e kantidat di habitante nasé na Colombia, Boneiru, Repúblika Dominikano, Hulanda Oropeo i Venezuela a krese. E kantidat di habitante na Boneiru ku a nase pafó di Hulanda Karibense, a oumentá ku 924.

Oumento leve di kantidat di habitante na Sint Eustatius

Sint Eustatius tabatin 3.348 habitante riba promé di yanüari 2026. Esei ta 78 mas ku na komienso di 2025, un oumento di 2 porshento. Aki tambe e kresementu tabata partikularmente debí na migrashon: mas hende a establesé nan mes riba e isla kompará ku e kantidat ku a bai (77 mas). Ademas un tiki mas hende a nase kompará ku e kantidat ku a fayesé.

E kantidat di habitante di Sint Eustatius ku a nase pafó di Hulanda Karibense, a oumentá ku 69. Partikularmente e kantidat di habitantenan nasé na Sint Maarten a krese. Tambe a bin mas habitante aserka ku a nase na Sürnam i Hulanda Oropeo.

Poblashon di Saba a krese ku 5 porshento

Riba promé di yanüari 2026 Saba tabatin 2.270 habitante. Esei tabata 112 mas ku un aña anterior, un oumento di 5 porshento. Na Saba tambe mas hende a establesé nan mes kompará ku e kantidat di hende ku a bai (119 mas). Ademas riba e isla akí tambe un tiki mas hende a nase kompará ku e kantidat di hende ku a fayesé.

E kantidat di habitante na Saba ku a nase pafó di Hulanda Karibense, a oumentá ku 120. Partikularmente e kantidat di habitantenan nasé na Sint Maarten, Filipina, Colombia i Merka a krese.