Mayoria alumno ke bandoná e islanan di Hulanda Karibense

© Skyview Bonaire -RCN Beeldbank
Mas di 80 porshento di alumnonan te 18 aña ku ta biba riba un di e islanan di Hulanda Karibense ke bandoná e isla den futuro i bai biba otro parti. Mira mas di mundu, sigui un estudio òf traha ta e motibunan mas menshoná. Mas o ménos un kuart di e alumnonan ta bisa ku nan no ta gusta riba e isla. Partikularmente na Boneiru, e proporshon di hóbennan ta bahando desde 2011 i segun espektativa e próksimo 10 añanan tambe. Esaki ta resultá for di un investigashon di Centraal Bureau voor Statistiek (CBS) ku ta kompañá e publikashon Caribbean Netherlands in Numbers 2025.

Di e alumnonan di enseñansa sekundario (VO) i enseñansa profeshonal intermedio (MBO), te 18 aña na Saba i Sint Eustatius, 91 porshento ta bisa na 2024 di ta deseá di bandoná e isla den futuro i bai biba otro kaminda. Na Boneiru esei ta 81 porshento. Di e alumnonan na Boneiru algu mas ku 56 porshento ta bisa di ta deseá esei, pa mira mas di mundu, na Saba esei ta kasi 60 porshento, na Sint Eustatius e ta ménos (45 porshento).

Mas di 40 porshento di alumno na Boneiru ta deseá di sigui studia otro parti

Di e alumnonan di VO i MBO na Boneiru 42 porshento ta bisa di ta deseá di sigui studia, despues ku nan logra nan diploma. Pa esei hopi biaha nan mester bandoná e isla. Na Saba i Sint Eustatius, respektivamente 53 porshento i 48 porshento ta deseá di bai sigui studia. Di e sobrá alumnonan, mayoria ta deseá di bai traha òf kuminsá un kompania propio. Un minoria ta duna di konosé ku nan no sa ainda.

Kompará ku 2020, alumnonan na Boneiru ta duna di konosé un tiki mas frekuente di ta deseá di traha òf kuminsá un kompania propio. Na Saba alumnonan ta duna di konosé un tiki ménos frekuente ku den 2020, di ta deseá di kuminsá un propio kompania i mas frekuente nan no tabata sigur ainda di nan plannan pa futuro.

Mayoria alumno ta haña bon konseho tokante kosnan importante den bida

Traha plan pa futuro i bai biba na un otro lugá ta eskohonan importante, pa kua por ta útil pa haña bon konseho. Na 2024, 79 porshento di e alumnonan na Boneiru tabata (kompletamente) di akuerdo ku e ponensia “Mi ta haña bon konseho tokante kosnan importante den bida”. Na Saba i Sint Eustatius esei ta práktikamente igual. Riba tur tres isla, 5 porshento òf ménos no tabata (ètòl) di akuerdo ku e ponensia akí.

Partikularmente na Boneiru e porshon di hóben ta bahando

E kantidat di hóben riba e islanan di Hulanda Karibense ta bahando. Na 2011, un kuart di e poblashon na Boneiru tabata 19 aña òf mas yòn, na 2025 esei ta 21 porshento. Segun e último pronóstiko di poblashon, na 2035 18 porshento di e poblashon lo ta mas yòn ku 19 aña.

Na Sint Eustatius e proporshon di hóben riba e poblashon kompleto ta baha ménos. Na 2011, un kuart di e poblashon tabata mas yòn ku 19 aña, espektativa ta ku e proporshon lo ta algu mas abou (23 porshento) na 2035.

Na 2011, 21 porshento di e poblashon na Saba tabata mas yòn ku 19 aña. Segun espektativa aki dies aña esei lo ta 17 porshento.

Publikashon spesial selebrando 15 aña di Hulanda Karibense

The Caribbean Netherlands in Numbers ta un publikashon anual ku ta usa relatonan, sifra, infografia, i potrèt pa duna un bista di e último desaroyonan den e sosiedat di Hulanda Karibense. E edishon spesial aki ta enfoká riba tendensianan di término largu. Kon e islanan a desaroyá for di dia 10 di òktober 2010, ku ofisialmente nan a bira munisipionan spesial di Hulanda?

Related items