Den kòmbersashon ku hóbennan tokante importansia di dato na Hulanda Karibense

Ekspektativa pa futuro

Esther Meijer-Sedney ta un analista estadístiko di CBS, i organisadó di e evento pa e hóbennan: ‘Mi ta mira hopi bentaha di e kontakto ku hóbennan. Pa nos ta importante pa hóbennan mira ku tin estadístika tokante nan propio bida tambe. Nos tin gana di tende kiko hóbennan ta pensa tokante esaki. E input ku nos ta haña asina, nos por kompartí ku stakeholdernan ku por tuma akshon a base di esaki. Nos a kuminsá awor na Boneiru, pero nos lo tin aktividatnan sigur tambe na Sint Eustatius i Saba.’

Meijer: ‘Espektativa pa futuro, kome salú, enseñansa, yega na fin di luna ku bo sèn i bienestar ta temanan ku hóbennan lo ke sa mas di dje. Pa nos, ta importante pa hóbennan sa ku tin dato ku a kompilá tokante esaki. Ta tremendo ku nos por a topa den biblioteka ku e hóbennan i bai den kòmbersashon ku nan. Den transkurso di e aña aki lo sigui diferente aktividat.’

Datonan relevante

Durante e siman di CBS na Biblioteka Públiko di Boneiru, a traha den gruponan chikí. E título di e seshonnan tabata: kiko ta pasa si bo bira un ditèktif di dato? A papia tokante e importansia di datonan relevante, i kon bo por distinguí echo i opinion, i tambe kon pa haña dato. CBS a yuda e hóbennan komprondé kon bo por forma un opinion a base di echonan. E partisipantenan a siña ku dato ta bini a base di investigashon. Nan a trein ku organisashon di nan propio proyektonan mini di investigashon, a inventá preguntanan di investigashon, definí e grupo di enfoke, i a presentá (pitch) nan ideanan.

Na tur, tabatin mas o ménos 75 hóben interesá, den tantu seshonnan den gruponan chikí, i tambe algun mini kues. Den e kuesnan aki, e partisipantenan a kontestá preguntanan tokante nan persepshon. A kompará e kontestanan ku kontesta di otro hóbennan di Boneiru. Esaki a hiba na diskushonnan animá. E kos di mas importante tabata ku esei a krea oportunidat pa kòmbersashon entre hóben di e komunidat na e isla.

Data-driven Youth

Mas lat e aña aki, tin un otro aktividat den koperashon ku Museo Terramar, ku e título Data-driven Youth (Hóbennan guiá pa datonan). Aki, hóbennan lo kuminsá traha di un forma kreativo riba datonan. Den un ‘datadriven art contest’ (konkurso artístiko a base di dato), hóbennan ta kuminsá traha un obra di arte a base di temanan indiká i ku CBS tin sifra tokante dje. Na Museo Terramar lo ekshibí e obranan di arte. Tambe, CBS lo organisá data awareness workshops (workshop di konsientisashon tokante datonan) na skol sekundario.