Forsa di kompra di tres kuart di habitante di Hulanda Karibense a subi na 2024

Forsa di kompra na Boneiru, Sint Eustatius i Saba a bolbe subi na 2024. Na Boneiru forsa di kompra a subi ku 13,7 porshento, kompará ku un aña anterior, na Sint Eustatius ku 10,8 porshento i na Saba ku 10,4 porshento. Mas òf ménos 75 porshento di e poblashon a mira un mehorashon. Partikularmente pa personanan den famianan ku un solo mayor i personanan den un kas di famia ku partikularmente entrada di benefisio sosial, forsa di kompra a resultá benefisioso. Esaki ta resultá for di sifranan di Centraal Bureau voor de Statistiek (CBS).

Gabinete, riba konseho di Komishon mínimo sosial, a introdusí desde 2023 algun medida di forsa di kompra nobo, pa drecha seguridat di eksistensia na Hulanda Karibense. Asina a hisa e Suèldu Mínimo Legal (WML) dos biaha den 2024. Tambe a hisa e kompensashonnan di Penshun di Behes General (AOV), Viuda i Huérfano (AWW) i di Onderstant. P’esei tambe forsa di kompra a subi pa tantu esnan ku ta traha, komo pa esnan ku ta risibí benefisio sosial.

Na Boneiru forsa di kompra promedio di personanan den kasnan di famia ku benefisio sosial komo nan fuente di entrada mas importante, a subi mas tantu, ku 21,8 porshento. Na Sint Eustatius i Saba nan a bai dilanti ku respektivamente 17,1 porshento i 10,7 porshento.

E benefisionan sosial mas haltu a pèrkurá tambe pa nuebe di kada 10 persona den kasnan ku partikularmente entrada di benefisio sosial bai dilanti. Esnan ku ta traha na Boneiru ta bai dilanti ku 13,2 porshento, na Sint Eustatius ku 10,5 porshento i na Saba ku 10,2 porshento. 90 porshento di e hulandesnan karibense ta biba den un kas di famia ku partikularmente entrada di trabou.

Famianan di un solo mayor ta benefisiá mas

Pa tur kas di famia, e forsa di kompra promedio a subi na 2024, pero partikularmente famianan di un solo mayor ta benefisiá mas tantu. Na Boneiru forsa di kompra ta drecha pa e grupo akí ku 19,0 porshento, debí tambe na oumento di kompensashon pa yu. Na Sint Eustatius i Saba forsa di kompra di famianan di un solo mayor a krese ku respektivamente 18,4 porshento i 15,9 porshento. Solteronan na Sint Eustatius mester a keda kontentu ku un subida promedio di forsa di kompra ku 5,6 porshento, esun mas abou di tur kas di famia.

Hóben i grandi a bai dilanti

Pa kasnan di famia di tur grupo di edat forsa di kompra a subi na 2024. Pa habitantenan di Boneiru ku un sostenedó di famia prinsipal te 40 aña, forsa di kompra a subi mas tantu, ku 16,1 porshento. Nan ta traha relativamente mas frekuente den sektornan kaminda ku suèldunan ta alrededor di suèldu mínimo i pa e motibu ei ta benefisiá di e subida di suèldu mínimo. Na Sint Eustatius forsa di kompra pa hóben a oumentá ku 11,6 porshento i na Saba ku 12,0 porshento. Grandinan ta benefisiá partikularmente di e subida di AOV.

Entradanan abou na Boneiru i Saba ta benefisiá mas tantu

Mas abou e entradanan ta, mas grandi e ganashi di forsa di kompra ta. Na Boneiru, ku 19,4 promedio, e forsa di kompra a subi mas tantu serka kasnan di famia ku entrada abou. Na Saba tambe partikularmente esnan ku entrada abou a benefisiá, ku subida di forsa di kompra di 16,1 porshento. Pa e otro gruponan di entrada tambe forsa di kompra a drecha.

Splikashon:

Medidanan di forsa di kompra

Na 2024 a hisa e Suèldu Mínimo Legal (WML). Na yanüari WML a subi ku respektivamente 27,1 porshento, 7,6 porshento i 15,4 porshento pa Boneiru, Sint Eustatius i Saba. Ku introdukshon di e mínimo sosial riba 1 di yüli 2024, a hisa WML na 1750 dòler pa tur e tres islanan. Esei ta representá un subida di 11,5 porshento, na Boneiru, 12,6 porshento na Sint Eustatius i 5,9 porshento na Saba. A redusí e gastunan pa dunadó di trabou, pa medio di redukshon di e primanan pa dunadó di trabou di 13,4 porshento na 2023 na 11,9 porshento na 2024.

A hisa e kompensashonnan di AOV i AWW konforme e desaroyo di e suèldu mínimo. E suma di AOV, meskos ku e kompensashon di AWW di mas haltu, ta awor temporalmente den proporshon di 85 porshento kompará ku e suèldu mínimo.

Ademas a redusí e primanan di dunadó di trabou, a bolbe oumentá e kompensashon pa yu i e kompensashon pa koriente ta ketu bai na vigor. Den e sifranan di forsa di kompra di 2024 e impakto di e medidanan akí ainda ta klaramente visibel.

Di akuerdo ku e konseho di Komishon mínimo sosial, a tuma tambe e mesun proporshon ei komo punto di salida temporal pa ònderstant pa un soltero ku ta biba riba su mes. A hisa e kompensashon pa yu tambe te 225 dòler pa kada yu pa luna na Boneiru i Saba i 216 dòler pa kada yu na Sint Eustatius i kasnan di famia ku entrada abou ainda por hasi uzo di e derecho riba kompensashon pa koriente di 1300 dòler.

Desaroyo di forsa di kompra

Ta kalkulá e desaroyo di forsa di kompra di un persona komo e porsentahe di kambio aña pa aña den entrada disponibel standarisá di kas di famia, ahustá na kambio di preis. Ta ordená e kambionan di porsentahe akí di abou bai ariba i e balor meimei– tambe konosí komo e balor promedio òf balor mediano – ta ekspresá e ora ei e kambio den forsa di kompra di e (sup)poblashon konserní. E forsa di kompra (dinámiko) por kambia debí na vários kousa. E entrada ta kambia por ehèmpel, debí na oumento di suèldu, promoshon, aseptashon di (otro) trabou i baimentu ku penshun. Tambe kambio den konstelashon di kas di famia (un yu ta bandoná kas, partnernan ta separá di otro) ta kondusí na kambio den entrada. Den kalkulashon di e desaroyo di forsa di kompra dinámiko a inkluí tur e kambionan aki kaba.

Ta kalkulá e forsa di kompra pa 2024, kompará ku e mes grupo di persona den 2023.

Gruponan di entrada

Pa kada persona a kalkulá e entrada disponibel promedio standarisá di e kas di famia di 2023 i 2024. E klasifikashon di e gruponan di entrada ‘kuartil’ ta basá riba e promedionan akí di 2023 i 2024. Asina ta koregí regreshon na e promedio.

A determiná e gruponan di entrada segun isla.

Promedio

Ku promedio kier men e mediano. Mediano ta e balor meimei di un distribushon di sifra, ordená di abou bai ariba. Mitar di e poblashon tin un balor bou e mediano, e otro mitar ariba dje.