Mayoria habitante di Hulanda Karibense ta duda tin bia den informashon ònlain
Na Boneiru i Sint Eustatius, kasi tur habitante di 15 aña òf mas tin akseso na internèt na kas (97 porshento). Na Saba e proporshon akí ta un tiki mas abou (92 porshento). Práktikamente tur hende riba e islanan (97 porshento) ta usa internèt diariamente òf kasi diariamente. Esaki por ta tur kaminda, no solamente na kas so, pero por ehèmpel na trabou tambe. Esaki ta resultá for di sifranan nobo di Ofisina Sentral di Estadístika (CBS) tokante uzo di internèt na Hulanda Karibense.
Di tur habitante, 94 porshento, a hasi yamada via internèt òf a hasi esaki via yamada di video, por ehèmpel via WhatsApp, Skype, Messenger òf MS Teams durante e último tres lunanan. Mes tantu persona a manda mensahe di teksto via por ehèmpel WhatsApp, Signal, Snapchat òf TikTok. 86 porshento a usa medionan sosial, manera Instagram, TikTok òf X. Habitantenan di Boneiru, Sint Eustatius i Saba no ta òf apénas ta diferensiá den esaki.
Na Boneiru i Sint Eustatius mas òf ménos 80 porshento di hende a regla asuntunan bankario via internèt. Na Saba esaki ta ménos,aya mas di 60 porshento di hende a hasi uzo di servisio bankario via internèt. Na Saba ménos hende ku a manda òf risibí meil, ku riba e dos otro islanan. Mas òf ménos 2 di kada 3 habitante a buska informashon ònlain tokante por ehèmpel produkto òf salú.
| Internetgebruik | Boneiru (% di personanan di 15 aña òf mas) | Sint Eustatius (% di personanan di 15 aña òf mas) | Saba (% di personanan di 15 aña òf mas) |
|---|---|---|---|
| Yama | 94.4 | 94.5 | 91.1 |
| Manda mensahe di teksto | 94.5 | 92.0 | 92.5 |
| Medionan sosial | 86.3 | 84.3 | 82.3 |
| Regla asuntunan bankario via internèt | 78.7 | 82.5 | 62.4 |
| Manda meil | 74.5 | 78.7 | 66.8 |
| 1) Den e último tres lunanan | |||
Mayoria habitante sa duda tin bia den kredibilidat di informashon ònlain
Na Boneiru i Saba dos terser parti di e habitantenan, den e último tres lunanan, a yega di mira òf lesa informashon ku segun nan no tabata bèrdat, òf di kua nan tabata duda si e tabata bèrdat. Na Sint Eustatius e proporshon akí tabata ménos, aya esaki tabata mas di mitar. Mayoria bia tin duda den informashon riba medionan sosial. Mas di mitar di e habitantenan di Boneiru i Saba a mira informashon riba medionan sosial, di kua tabata sa ku no tabata bèrdat, òf ku tabata duda den dje. Esaki tabata mas haltu ku na Sint Eustatius, aya esaki tabata 40 porshento. Riba wèpsaitnan di notisia i otro lugánan riba internèt, ménos frekuente, a mira informashon ku tabata duda den dje.
| Medium | Boneiru (% di personanan di 15 aña òf mas ) | Sint Eustatius (% di personanan di 15 aña òf mas ) | Saba (% di personanan di 15 aña òf mas ) |
|---|---|---|---|
| Total | 65.8 | 52.5 | 65.7 |
| Riba medionan sosial | 50.5 | 39.8 | 53.3 |
| Riba wèpsaitnan di notisia | 13.2 | 14.5 | 18.4 |
| Riba un otro sitio riba internèt | 10.3 | 10.0 | 16.6 |
| 1)Den e último tres lunanan. Mas ku un kontesta ta posibel | |||
Mas di tres kuart di habitante ta kontrolá informashon ònlain
Mas di tres kuart a yega di kontrolá si e informashon riba internèt ta bèrdat. Nan a hasi esei por ehèmpel dor di kontrolá di e fuentenan, konsultá fuentenan di internèt konfiabel òf otro fuentenan ku no ta internèt, òf dor di diskutí e informashon ku otro personanan. Habitantenan di Sint Eustatius a hasi esaki mas frekuente ku habitantenan di Boneiru.
Mas òf ménos 30 porshento di e personanan a yega di kontrolá si un wèpsait ta seif. Por ehèmpel dor di kontrolá si e adrès ta kuminsá ku https òf dor di averiguá si tin un logo di siguridat presente. Akiden no tabatin diferensia entre habitantenan di e tres islanan.
| Controle | Boneiru (% di personanan di 15 aña òf mas ) | Sint Eustatius (% di personanan di 15 aña òf mas ) | Saba (% di personanan di 15 aña òf mas ) |
|---|---|---|---|
| A kontrolá si e informashon riba internèt ta bèrdat | 74.0 | 81.1 | 77.1 |
| A kontrolá si un wèpsait ta seif | 31.6 | 32.8 | 28.7 |
| ¹⁾ Den e último tres lunanan. Diferente kontesta ta posibel. | |||