Durante e di dos kuartal di 2011 e inflashon riba e islanan di Karibe Hulandes tabata muchu mas haltu kompará ku e promé kuartal di e aña aki. Na Sint Eustatius e inflashon tabata esun di mas haltu ku 10,5 porshentu durante e di dos kuartal. Den e promé kuartal esaki tabata ainda 7,0 porshentu. Na Saba i Boneiru tambe e inflashon a oumentá durante e di dos kuartal.
Pa motibu ku kuminda a bira mas karu inflashon na Boneiru a oumentá
E inflashon na Boneiru durante e di dos kuartal a resultá 5,0 porshentu. Esaki ta 0,8 punto porshentu mas haltu kompará ku e promé kuartal di e aña aki. Prinsipalmente preisnan di komestibel i bebidanan no alkohóliko tabatin un efekto bárbaro di oumento riba e inflashon.
Komestibel i bebidanan no alkohóliko tabata den e di dos kuartal 6,8 porshentu mas karu kompará ku un aña pasa. Den e promé kuartal dje aña aki esaki tabata ainda 3,6 porshentu. Prinsipalmente karni i pan i produktonan di trigo tabata mas karu. Bebidanan alkohóliko i tabako tambe a oumentá e inflashon. Sigaria a oumentá durante e di dos kuartal klaramente mas den preis kompará ku e promé kuartal di e aña aki.
Inflashon Bonaire
Preisnan di transporte i energia a oumentá e inflashon na Sint Eustatius
Inflashon durante e di dos kuartal 2011 na Sint Eustatius a resultá 10,5 porshentu. Ku esaki e inflashon na Sint Eustatius tabata konsiderablemente mas haltu ku den e promé kuartal di 2011 ku tabata 7,0 porshentu. E inflashon haltu aki a keda okashoná pa motibu di e preisnan di elektrisidat i transporte.
E preisnan di mantenshon i reparashon di bibienda, awa i energia tabata 15,9 porshentu mas haltu kompará ku un aña pasa. Esaki ta komo konsekuensia di oumentu bárbaro di preisnan di elektrisidat. Transporte públiko tambe a bira mas karu. Prinsipalmente pasashi pa avion i pa mantenshon di outo i gasolin e komunidat mester a paga mas karu. Mas aleu e sektor di horeca a konosé un efekto leve di oumentu riba e inflashon. E preisnan di horeca tabata durante e di dos kuartal di e aña aki un kuart mas haltu kompará ku aña pasa. Durante e promé kuartal di e aña aki esaki tabata 21 porshentu.
Inflashon Sint Eustatius
Inflashon na Saba tabata haltu pa motibu di kuminda i elektrisidat
Inflashon durante e di dos kuartal 2011 na Saba a resultá 6,9 porshentu. Esaki ta klaramente mas haltu kompará ku e promé kuartal di 2011, na momentu ku e inflashon tabata 4,7 porshentu. Prinsipalmente e preisnan di energia i kuminda a kontribuí na oumento di e inflashon durante e di dos kuartal.
Komestibel i bebidanan no alkohóliko tabata den e di dos kuartal 6,9 porshentu mas karu kompará ku e mesun periodo di aña pasa. Den e promé kuartal dje aña aki esaki tabata 2,1 porshentu. Entre otro pan i produktonan di trigo i fruta a bira mas karu durante e di dos kuartal di 2011. Mantenshon i reparashon di bibienda, awa i energia a bira 9,4 porshentu mas karu kompará ku un aña pasa. Esaki ta pa e mesun motibu ku nan Sint Eustatius, esta prinsipalmente dor di e oumentu bárbaro di e preisnan di elektrisidat.
Inflashon Saba
Ahuste
E sifranan di 2010 i di e promé kuartal di 2011 a keda ahustá respekto publikashonnan anterior komo konsekuensia di informashonnan ku a keda risibí despues. E sifranan aktual ta definitivo. E sifranan di e di dos kuartal di 2011 no ta sifranan definitivo, e sifranan definitivo lo keda fihá na momento di publikashon di e di tres kuartal.
Fuente: StatLine, Inflashon Karibe Hulandes
